Katolski Posoł 20.07.2003

Farar Hrjehor: Njerezignujće!

Farar Hrjehor kadźi swjaty křiž na Hórnikowym domje.   Foto: rl

Poprawom je derje, hdyž so šulske lĕto tak skonči kaž so spočina: z Božej mšu. A tola bĕ wĕsty jĕrki přisłod na koncu šulskeho lĕta w Chrosćicach začuć. Wšako je so tamniša Serbska srjedźna šula zawrĕła. Farar Clemens Hrjehor pak pokaza w swojim prĕdowanju na Božej mši pjatk, 11. julija, w połnje wobsadźenej Chrosčanskej cyrkwi na Emawskeju wučomnikow, kotrejuž situaciju z tej w Chrosćicach přirunowaše: Njejstaj to chcyłoj, štož bĕ so stało, bĕštaj zrudnaj, ale nazhoništaj, zo je žiwjenje sylniše hač smjerć. "Snano tež nazhonimy, zo je žiwjenje našeho ludu sylniše hač kožda poražka", přiwoła farar wĕriwym. Namołwi, zo njemĕli zadwĕlować. "Bóh powjedźe nas po puću, kotryž dźensa hišće njeznajemy." Po kemšach dźĕchu wĕriwi w procesionje k Hornikowemu domej, hdźež poswjeći farar Hrjehor wony swjaty křiž, kotryž su Ralbičanscy wosadni Chrosčanam před lĕtomaj darili. R. Ledźbor

Próstwa na ministerskeho prezidenta

Předsyda Towarstwa Cyrila a Metoda z.t. (TCM) farar Šćĕpan Delan je so 10. julija z listom na sakskeho ministerskeho prezidenta Georga Milbradta wobroćił. W tutym jeho prosy, zo by pruwować dał, hač njehodźi so zawrjenje Chrosčanskeje srjedźneje šule tola hišće cofnyć. Wobžaruje mało sensibelnosće ze stron křesćansko-demokratiskeho knježerstwa w tutej naležnosći.

Poćahujo so na jeho zetkanje ze zastupjerjemi TCM z dnja 16. junija, dopomni farar Delan na so kopjace wobškodźenja swjatych křižow. Poprosy ministerskeho prezidenta wo podpĕru w tutej naležnosći. rl