Nowinska zdźělenka

04.07.2003

Stawizny

Wotmołwa wozjewjenju Sucheho

Rěčnik za europsku a mjeńšinowu politiku frakcije PDS w Sakskim krajnym sejmje, Heiko Kozel, rjekny k nowinskemu wozjewjenju direktora Załožby za serbski lud:

Knjez Suchy, direktor Załožby za serbski lud, je mi "kategorisce kóždežkuli dalše zhromadne dźěło" wupowědźił. K tomu móžu jeno kategorisce rjec: To njeńdźe. Chiba zo, k čemuž pak móc nima, wón by mje ze załožboweje rady ćisnył, abo ja - na čož jako socialistiski demokrat we wokomiknej situaciji ani wosnje njemyslu - bych sej žadał wupowědźenje załožboweho direktora.

Bratr Suchy by chcył mi, staćanej zwjazkoweje republiki, kotryž ma po zakładnym zakonju prawo na swobodne zwuraznjenje měnjenja, mi, zapósłancej krajneho sejma, kotryž ma swobodny, to rěka wot nikoho  so přikrótšić njehodźacy mandat, mi, Serbej, wot Domowiny do załožboweje rady wuzwolenemu a z tym za zastupowanje zajimow serbskeho ludu zawjazanemu, prawa wotrjec, zo praju, štož myslu.

Nic ja sym aktualnu šulsku politiku do bliskosće k najčornišim kapitlam šulskeje politiki Němskeje napřećo Serbam přinjesł,  to je jeničce wuslědk politiki sakskeho knježerstwa. Abo njeje da próstwa wo pomoc na bamža ze stron Domowiny wuraz zadwělowanosće rěčnicy serbskeho ludu? A připódla prajene: K čornym kapitlam serbskich šulskich stawiznow liču tež wone, kotrež su pod mjenowakom 7. a 4. wuwjedźenskeho postajenja w NDR serbskemu šulstwu škodu načinili. Bratr Suchy zakaza mi,  historikarjej, w stawiznach paralely namakać, přicpěwa sej pak jako muž CDU kaž jeho stronjenjo prawo, diktaturu w NDR z fašistiskej diktaturu přirunować a na samsny schodźenk stajeć směć.

Bratr Suchy mi wumjetuje, ja njebych prócowanje sakskeho knježerstwa  wo spěchowanje serbskich naležnosćow objektiwnje posudźował. Bych ja snadź statnemu knježerstwu k woli zawrjenje ryzy serbskeje šule nic wohroženje serbskeje substancy mjenować směł? Bych ja rjec dyrbjał, zawrjenje serbskich šulow, rozwjazanje serbskeje šulskeje syće je spěchowanje Serbstwa ?

Bratr Suchy nochce hižo ze mnu hromadźe dźěłać, złožujo so při tym na pozdatne zranjenje "wšěch demokratiskich normow" (!) z mojeje strony. Što chce bratr Suchy jeno činić? Sej wuši zatykać, hdyž ja namjety abo kritiku, tež na wjedźenju naležnosćow załožby, wupraju, abo rumnosć wopušćeć, hdyž ja w njej sedźu, abo chce mje politisce eksekutěrować ? Zrozumju hněw bratra Sucheho, zo njenamaka šulska politika w Sakskej ze stron Serbow a jich přećelow lědma přihłosowanje. Ale to je jeho, nic mój problem. Je tež  problem bratra Sucheho, zo njeje žanežkuli namjety za serbskim zajimam słužacu serbsku šulsku syć na blido połožił.