PVL 07-08/2003

Ponižowanje serbskeho ludu

Powěsć wo zawrjenju Serbskeje srjedźneje šule "Jurij Chěžka" w Chrósćicach je mjez Serbami wulki njeměr a wótre protesty wubudźiła. Dwě lěće po "Chrósčan zběžku", kotryž namaka po wšej Sakskej a we wukraju šěroku podpěru, je nětkole po zdźělence sakskeho kultusoweho ministerstwa doskónčnje: Serbska srjedźna šula, ryzy serbska a z tym přewšo wažna za zachowanje serbskeje rěče, začini ke kóncej šulskeho lěta swoje durje.

Rěčnik za europsku a mjeńšinowu politiku frakcije PDS, Heiko Kozel, ma zawrjenje serbskeje srjedźneje šule za wjace hač jeno njepřećelny akt sakskeje šulskeje politiki."Wone je hotowe ponižowanje serbskeho ludu,"wón měni."Njehladajo na wšě próstwy swójskeho wolerstwa, zacpěwajo narodne a mjezynarodne protesty a bjez respekta před zasadami europskeho mjeńšinoweho prawa ma so statne knježerstwo  ze zawrjenjom šule dale po swojim krutym wustawu zranjacym kursu zničenja serbskeje zakładneje substancy."

Rozsud statneho knježerstwa, Chrósčansku šulu zawrěć, je po jeho měnjenju dyr mjezwoči serbskich  dźěći, jich staršich, serbskeje zjawnosće a tež demokratisce a napřećo mjeńšinam přećelnje zmysleneje zjawnosće Němskeje a nic naposledku plista do mjezwoča serbskich wolerkow a wolerjow CDU, kotřiž su hač do poslednjeho wokomika hišće nadźije do přewróta w politice napřećo Serbam na dobro serbskeho šulstwa měli.

Frakcija PDS bě tuž na poslednje wuradźowanje krajneho sejma před lěćnej přestawku swój namjet (Ćišćenka 3 /7585) stajiła, w kotrymž sej žada,"rozsud wo cofnjenju sobuskutkowanja Swobodneho stata Sakska na zarjadowanju 5. rjadownje na Serbskej srjedźnej šuli Chrósćicy" hnydom wróćo wzac." (Namjet PDS namaka połne přihłosowanje  SPD, so pak wot CDU wotpokaza. Serbski zapósłanc CDU Marko Šiman so hłosa wzda).

Domowina je so - štož namaka w němskich medijach sylny wothłós - na bamža Jana Pawla II. z próstwu wo pomoc wobróćiła. W lisće prosy Domowina bamža, so "sobu zasadźeć za zdźerženje našeho małeho serbskeho naroda". W lisće informuja bamža wo tym, zo sakske kultusowe ministerstwo ke kóncej julija "šulu woneje wosady zawrje, kotruž Sće před nimale 30 lětami wopytał." Rěčnica Serbow ma tele postupowanje sakskeho knježerstwa za njewobkedźbowanje europskeho mjeńšinoweho prawa a jako liwke wukładowanje wustawy a dalšich zakonjow w Sakskej. "Wola Serbow, směć zachować swoju mału a jara sensibelnu syć serbskich šulow, pak  so njesłyši", kritizuje Domowina.

Hač drje so Domowina po swojim přilubjenju z lěta 2001 po zakónčenju "Chrósčan zběžka" změje, zo je so drje bitwa přehrała, zo pak so bój dale wjedźe ? 

-eska-