Serbske Nowiny 14.08.2003

Wo wudawkach skóržby Chrósčanow rĕčeli

Budyšin (SN/AW). Z přihotami posedźenja Zwjazkoweho předsydstwa Domowiny, kotrež wotmĕje so 30. awgusta w Janšojcach, zabĕraše so wčera jeho prezidij. Tam poda Křesćan Ela, namĕstnik nawody RCW, rozprawu wo stawje projekta WITAJ w Delnjej Łužicy. Prezidij přihotowaše wobzamknjenje, kotrež skedźbni na to, zo njemĕł Europski bĕrow za mjenje rozšĕrjene rĕče (EBLUL) politiske dźĕło wukonjeć, ale rĕč spĕchowace naprawy. Zdobom zhonichu přitomni wo mjezystawje zwoprawdźenja dźĕłowych smĕrnicow Domowiny. Prezidij so dojedna, zwołać 11. hłownu zhromadźiznu Domowiny na 27. mĕrca 2004 do Hochozy.

"Zabĕrachmy so dale z wudawkami za skoržbu wokoło Chrósčanskeje šule", tak předsyda Domowiny Jan Nuk dźensa napřećo SN. K tomu je won list na serbske towarstwa wotposłał, w kotrymž wo pjenježnu podpĕru prosy. "Nadźijam so, zo so přez spĕšnu próstwu na sudnistwo hišće do zahajenja noweho šulskeho lĕta poradźi, Chrósčansku srjedźnu šulu před zawrjenjom zachować."