Serbske Nowiny 18.08.2003

Přidatny paragraf w šulskim zakonju

Drježdźany (SN/mwe). 5. komora Drježdźanskeho zarjadniskeho sudnistwa rozsudźi tuton tydźeń na zakładźe spĕšneje próstwy staršich we wobłuku jich skoržby, hač wostanje Chrosčanska šula přichodnu pondźelu dale zawrjena abo nic. Tole zdźĕli dźensa Serbskim Nowinam rĕčnik sudnistwa Bernd Job prajo, zo ma naležnosć "njesmĕrnu rozbušnu moc". Po zdźĕlenju prawiznika Torstena Schmidta, kotryž skoržacych staršich a jich dźĕći zastupuje - w cyłku je to nĕtko 42 - je dyrbjał rozsud hižo zańdźeny pjatk padnyć. Jedna přičina toho, zo k tomu došło njeje, je zmĕna w sakskim šulskim zakonju poćahujo so na saksku wustawu. Njedawno schwali sakski krajny sejm wosebje hladajo na situaciju Serbow přidatny paragraf. Wnim rĕka, zo njejstej wot 1. awgusta dwučarowosć a dotalna žadana ličba šulerjow we wuwzaćnym padźe předpisanej. Konkretne ličby pak dotal njepředleža. Wpadźe skoržby staršich a Chrosčanskeje gmejny wo zachowanje šule matej wobĕ stronje - skoržacy a kultusowe ministerstwo - wĕzo přiležnosć spřećiwjenje na wyše krajne sudnistwo w Budyšinje zapodać. Tuž je najwjetši čas, zo bychu Chrosčanske dźĕći wĕdźeli, dokal póńdu dźensa za tydźeń do šule.