Serbske Nowiny 19.08.2003

Druhdźe wo nas

Bój Serbow wo zachowanje šulow

Köln. Pod aliterarisce sformulowanym nadpismom "Starosće Serbow" wozjewi njedawno dźenik "Kölner Stadt-Anzeiger" na eksponowanym mĕstnje pozadkowy přinošk wo Serbach. Awtor Harald Biskup rozprawja wo njewšĕdnym podawku, zo ma so w nĕmskej prowincy jedna šula zawrĕć, a to Serbska srjedźna šula Chrósćicy, štóž wulku kedźbnosć we wukrajnych nowinach - w Polskej a Čĕskej - namaka.

Nastawk je wotćišćany pod hostnym přinoškom wuznamneho sociologi Sira Ralfa Dahrendorfa. Tuton wopisuje poćah Wulkeje Britaniskeje k Europje. Tak mjenuja tradicionalni Britojo Atlantik "pond"-hat, za kotrymž Američenjo bydla, takrjec kaž na druhej strony samsneje wsy. Jeli pak Britojo do francoskeje Normandije abo do italskeje Toskany jĕdu, praja, zo podadźa so do Europy. Hačkuliž su přez tunel zwjazane, je Europa za nich zdaleny kontinent. Po politiskich reformach pak ma Dahrendorf nadźiju, zo so Rukawowy kanal pomału, krok po kroku zwusči a atlantiski hat so rozšĕri.

Mjenje znate kaž za Britow Europa su za Nĕmcow Serbja. Biskup piše, zo je hakle přez prezentaciju serbskeje folklory na BUGA 1985 w Choćebuzu šĕrša zjawnosć Nĕmskeje wo eksistency Serbow zhoniła. Do tutoho podawka njebĕ hišće wšĕm Nĕmcam znate, zo su Serbja drje nĕmscy staćenjo, ale zo njejsu Nĕmcy. Serbja sami pak njejsu runje zbožowni přez tute redukowanje na folkloru, mĕni Biskup. Won pak přispomni, zo bĕ to za čas NDR tež hižo tak.

Serbja pak dale wojuja wo swoju eksistencu, zo njeby sojich maćeršćina stała z cuzej rĕču. Při tym mćža so katolscy Serbja złožić na sakskeho ministerskeho prezidenta prof. Georga Milbradta, kotryž dźĕ je tež katolik. Won je zwuraznił, zo so kwalita stata pokazuje tež w tym, kak stat ze swojimi mjeńšinami wobchadźa. Tak skonči so přinošk Haralda Biskupa.

Tajki nowinski nastawk podpĕruje boj Serbow. Po mĕnjenju sociologije zamožeja mjeńšiny swoje zajimy lĕpje přesadźeć, hač wulke towaršnostne skupiny. Pola nas Serbow pak so zda, zo tuta teorija njepřitrjechi. Rjenje by było, hdyž by to so w přichodźe k lĕpšinje Serbow a sociologiskeje teorije zmĕniło.