Serbske Nowiny 15.07.2003

ZAPÓSŁANE

K oficialnemu wopodstatnjenju zawrjenja Serbskeje srjedźneje šule "Jurij Chĕžka" Chrósćicy mĕni Marcel Braumann z Drježdźan:

Z ličbu šulerjow so w Sakskej definuje, hač je zjawneje potrjeby dalewobstaća šule abo nic. A tohodla ma so nĕtkole Chrosčanska srjedźna šula woprować. Dopomniwši so na swoj šulski čas w Hamburgu možu zwĕsćić, zo njeje wšudźe w Nĕmskej z wašnjom, so tak absolutnje po tymle kriteriju mĕć. Sym dźewjeć lĕt łaćonsce a pjeć lĕt starogrjeksce wuknył, k tomu słušeše tež wobdźĕlenje na wukonowym kursu starogrjekšćina w poslednimaj lĕtomaj domatury. Wprĕnim lĕće kursa bĕchmoj we wulkim rumje dwĕ wosobje, wučer a ja. Wdruhim lĕće so namaj dalši sobušuler phdruži. To wšo sta so njedźiwajo na oficialne postajenje, zo mĕli so na kursach wysokeho schodźenka gymnazija přerĕznje dźesaćo a w jednotliwym padźe znajmjeńša wosmjo wobdźĕleć. Tola jezuitske nawodnistwo našeje šule je z krutym rjapom přećiwo šulskemu zarjadej přesadźiło, zo słuša kompletny poskitk wučby starogrjekšćiny k profilej kubłanišća a zo ma ton so pod wšĕmi wobstejnosćemi zaručić. To rĕka: Ličba njesmĕ w tym padźe z rozsudnym kriterijom być, přetož je jasne, zo je jenož mało śulerjow zwolniwych, sej dobrowolnje napinanja z tutej ćežkej "mortwej" rĕču načinić. Hdyž je serbstwo woprawdźe z wobstatkom profila Sakskeje, kaž tež krajne knježerstwo wospjet wobkrući, potom njech za žiwu rĕč serbšćinu w Sakskej znajmjeńša samsne prawo płaći kaž za wotemrĕtu starogrjekšćinu w Hamburgu. To rĕka, zo nima so najwobšĕrniši poskitk wšĕdneho nałožowanja serbskeje rĕče w šuli jenož w rjadowni, ale tež na šulskim dworje - a to w Chrosćicach mamy - cyle njewotwisnje wot lićby šulerjow zachować. A přirimujo z mojim naspomnjenym kursom je za přichodny Chrosčanski pjaty lĕtnik pomĕrnje wjele šulerjow prizjewjenych.

Předsyda zarjadniskeho zwjazka "Při Klošterske j wodźe" Alfons Ryćer piše:

Powĕtrowy balon z napisom "Štož nam šulu bjerje, ton na Serbow serje" je zwobraznjeny na prĕnjej stronje wčerawšeho wudaća SN. Wobraz nasta při protestnym zarjadowanju minjeny pjatk na dworje Chrosčanskeje srjedźneje šule. Na zarjadowanju bĕchu tež přitomni předsyda Domowiny a dalši reprezentanća našeje narodneje organizacije. Rozumju přesłapjenje mnohich nastupajo zawrjenje Chrosčanskeho kubłanišća ke koncej šulskeho lĕta 2002/2003. Rozumju tež impulsiwne reakcije dźĕći a młodostnych. W tutym konkretnym padźe pak wočakuju wot předsydy Domowiny, zo so wot přepjatych wuprajenjow zarjadowanja na šulskim dworje w Chrósćicach zjawnje distancuje. Njestanje-li so to, zwostawa mjez wobydlerstwom a na wšitkich politiskich runinach zaćišć, zo Domowina mjenowane a podobne wuprajenja toleruje a snano samo zastupuje. Njech knjez Nuk njezabudźe, zo je jemu sakski ministerski prezident hakle njedawno w Budyšinje wobkrućił wobšĕrnu podpĕru a njezmčnjene lĕtne přiražki Załožbje za serbski lud, wšojedne kak dalši pjenjezydawarjo spĕchowanje dale wjedu. Njech knjez Nuk tež njezabudźe, zo je mjeriśinowa politika Sakskeje, Braniborskeje a Zwjazkoweje republiki Nĕmskeje porno postupowanju wjetšiny europskich krajow napřećo swojskim mjeńšinam wjace hač přikładna. Njech njedadźa so reprezentanća Domowiny w swojich wuprajenjach a jednanjach wot emocijow wjesć. Njehladajo wšitkich přesłapjenjow njech mudre a přemyslene rozsudy tworja. Hewak riskĕruja, zo njemože jujenožpolitiska zjawnosć na wšĕch runinach, ale tež wjetšina serbskeje ludnosće hižo připoznawać jako rĕčnicu Serbow. Prošu wo to, zo so moje wuprajenja njewobhladuja jako hroženje, ale jako derje mĕnjena rada.