Tezy za wukaz Sakskeho statneho ministerstwa za kultus nastupajo serbske šule

- Wšitkim dźěćom, kotrychž starši sej dwurěčne kubłanje přejetaj, so wopyt serbskeje šule zaruča.

- Je-li zjawna potrjeba - t. r. hdyž sej to starši přeja - zarjaduje swobodny stat dalše serbske šule, na kotrychž so po koncepće dwurěčneho kubłanja dźěła. Z tym so na předšulske dwurěčne kubłanje projekta WITAJ nawjazuje. Wo serbskej šulskej syći rozsudźa kultusowe ministerstwo po dojednanju z nošerjom a Domowinu.

- Nimo powšitkownych kubłanskich zaměrow je wukmanjenje w serbšćinje a w němčinje ćežišćo šulskeho kubłanja.

- Za zaručenje rěčnych kmanosćow na wysokim niwowje ma podźěl serbšćiny jako maćeršćina abo jako druha rěč w zakładnym schodźenku znajmjeńša 75 % a w srjedźnym schodźenku znajmjeńša 50 % wučinić.

- We wučbje a w zwonkawučbnym wobłuku ma nałožowanje serbšćiny jako mjeńšinoweje rěče prioritu. Šulerjej skićeja so tajke wuměnjenja, zo so w serbskej identiće skruća, zo ju wuwiwa a so na serbskim žiwjenju wobdźěla.

- Dwu- abo wjacerěčnosć, kotraž wopřija serbšćinu, je wuměnjenje za dźěło na serbskej šuli. Wučerjo a dalši w šuli dźěłacy personal serbšćinu wobknježa a ju nałožuja.

- Zasadźenje rěčnje a fachowje wukmanjenych wučerjow so dołhodobnje zaruča.

- Wučerjam z njedospołnymi rěčnymi kmanosćemi poskića so powołanje přewodźacy intensiwny kurs serbšćiny, kotryž so jako lětne kubłanje přewjedźe.

- Wyša dohladowanska instanca přepoda fachowy dohlad za serbske šule referatej, w kotrymž dźěłaja serbscy fachowcy. Wšitke dokumenty, kotrež serbske šule nastupaja, su w serbšćinje a němčinje wuhotowane.

- Zakład krajneho zakonjedawarstwa nastupajo serbske šulstwo su europske dokumenty za škit regionalnych a mjeńšinowych rěčow, kotrež je zwjazkowe knježerstwo podpisało.

- Na tutym zakładźe wuchadźa za serbske kubłanske zarjadnišća, w kotrychž so serbšćina na maćernorěčnym niwowje podawa:

- pěstowarnje: znajmjeńša 5 dźěći na skupinu

- zakładna šula: znajmjeńša 7 dźěći na skupinu; rjadowniski dźělak 20; jednočarowosć; skupinska wučba

- srjedźna šula: znajmjeńša 7 šulerjow na rjadownju; rjadowniski dźělak 20; wotzamknjenje hłowneje šule resp. realki je tež při jednočarowosći šule zaručene z tym, zo so w předmjetach serbšćinje, němčinje, matematice, prěnjej cuzej rěči, fyzice a chemiji we wobłuku rjadownje diferencuje

- Serbski gymnazij: w orientaciskim schodźenku je jednočarowosć a wot 7. lětnika sem dwučarowosć móžna

- W zhromadnym skutkowanju z nošerjom zaruča statne knježerstwo financowanje serbskich šulow. Financne połoženje nošerja njesmě wuskutkować, zo so serbska šula zawrje abo njezarjaduje. Šule z wurjadnym wuznamom za serbski narod móža so jako statna šula w swobodnym serbskim nošerstwje wjesć.

Zhromadny naćisk Rady za serbske naležnosće Sakskeho krajneho sejma a Domowiny, zapodaty kultusowemu ministerstwu dnja 9. julija 2003