Dwě lěće po Chrósčanskim zběžku je gmejna Chrósćicy dóstała wukaz kultusoweho ministerstwa, w kotrymž so jej zdźěli, zo kultus wučerjow hižo njebudźe płaćić. Facit: Šula so zawrje. Tola 13 staršiskich domow so přećiwo tomu ze skóržbu na zarjadniskim sudnistwje w Drježdźanach wobara. Bohužel móža jenož jednotliwcy skoržić, dokelž kolektiwne prawo jako Serbja zakonsce zaručene njeje. Kročel Chrósčanskich staršich pak je zakład za dalše politiske jednanja, zo by so syć serbskich šulow zachowała.
Mjezynarodny wothłós, kotryž so w zwisku z aktualnymi podawkami znowa jewi a kiž je na tutej stronje dokumentowany, pokazuje znowa šěroke zrozumjenje za to, zo ma šulstwo za mjeńšinowu rěč wusahowacu wahu. Płaća-li za mjeńšinu samsne postajenja kaž za wjetšinowu ludnosć, je to za perspektiwu małeho naroda strašne. Dotal zamołwići sakscy politikarjo prosće přewidźa, zo ma zawrjenje jeničkeje našeje šule wuskutki za přichod serbšćiny, kotrež hižo njebudu korigujomne. Zawrje-li so porno tomu němska šula, potom je to za potrjechenych tohorunja zlě; eksistenca němčiny pak njeje wohrožena.
Dokelž słuša serbšćina k najwohroženišim rěčam, su hinaše rjadowanja za šulstwo trěbne, mjenujcy tajke, kotrež serbskej rěčnej a narodnej situaciji wotpowěduja. Sakska serbska rada a Domowina ze swojim čłonskim towarstwom SŠT stej kultusowemu ministerstwu zapodałoj předstawy wo tym, kotre rjadowanja su za naše šulstwo trěbne. Tute tezy (hlej dokumenty) maja być zakład za prawniske postajenje k šulskemu zakonjej, kotrež zmóžnja tajke wuměnjenja, zo móža šule woprawdźe jako posrědkowarnje serbskeje identity skutkować.
Konto za dary "Přichod šule - Zukunft Schule"
Na přeće mnohich podpěraćelow boja wo zachowanje serbskeje šulskeje syće je Domowina konto zarjadowała, na kotrež móža so pjenježne dary přepokazać. Z nich budu so starši podpěrować, kotřiž přećiwo zawrjenju Chrósčanskeje šule skorža.
Mějićel konta/Kontoinhaber: Domowina z.t./e.V. Banka/Bank: Deutsche Bank Bautzen Kontowe čo./Kt.-Nr.: 61 23 269 01 Směrowe čisło/Bankleitzahl: 870 700 00 Zaměr/Zweck: "Přichod šule - Zukunft Schule" Čitajće dale!
Nowostki