 |
Jan Nuk, Budyšin
Rěčmy wo awtonomiji serbskeho šulstwa
Situacija serbskeho šulstwa bywa dźeń a komplikowaniša. Dale a wjace serbskich šulow so zawěra. Zběhnjenje A-šulstwa a zawjedźenje dwurěčneho kubłanja je stworiło njepřewidnu, w kóždej šuli diferencowanu situaciju w dwurěčnym kubłanju. Kwalita maćernorěčneho kubłanja ćerpi dla hromadźepołoženja maćernorěčnych dźěći a dźěći z mjenje serbskimi znajomosćemi. Nimamy zhromadnu, wšitke serbske šule jednoćacu filozofiju za narodne kubłanje našich dźěći. Serbscy politisce zamołwići nimaja swobodny přistup do šulow, njeje móžno, za Serbow trěbne kubłansko-politiske procesy zwoprawdźeć, ani skutkownje přewodźeć. Skrótšenja dźěłoweho časa wučerjow wjedu k tomu, zo zasadźuje so wjace němskich wučerjow na serbskich kubłanišćach.
Zasadnje zwěsćamy: Tuchwilne strukturne zapołoženje serbskeho šulstwa w Sakskej je za zaručenje přichoda našeho ludu njedosahace . Skerje a wěsće powjedźe w blišim času k pospěšenej asimilaciji našich dźěći.
Jenički wupuć z tuteje njespokojaceje situacije je kubłanska awtonomija. K tutej tematice skića so wšitkim zajimcam nadrobniše informacije wo prěnich rozmyslowanjach:
Domowina přeprošuje na 4. dźeń zachowanja serbskeje šulskeje syće pjatk, dnja 2. septembra 2005, w 19 hodź. do Chrósćic.
W 19.00 hodź. wotměje so Boža mša we wosadnej cyrkwi.
Něhdźe w 19.45 hodź. přizamknje so zarjadowanje na šulskim dworje.
Zaměr je, zjawnosć wo aktualnej situaciji w serbskim šulstwje a tuchwilnych zakonskich wuměnjenjach a jich konsekwencach informować. Nadrobniše informacije k prašenju serbskeje kubłanskeje awtonomije resp. k prěnim předstawam wo njej podadźa so potom w towarstwowej rumnosći wjacezaměroweje hale "Jednota", hdźež je składnosć k hłubšej diskusiji wo tutej tematice.